न्यूज अभियान
हरेक खबर विशेष खबर

महेन्द्रनगर, १८ असोजः कञ्चनपुरको महेन्द्रनगरमा जारी पुरुष डबल्स जिल्लास्तरीय ब्याडमिन्टन प्रतियोगिताको उपाधि किरन खत्री र कमलसिंह भाटको जोडीले जितेको छ । आज भएको सम्पन्न फाइनल खेलमा विवेक ऐर र जनक ठगुन्नाको जोडीलाई पराजित गर्दै खत्री र भाटको जोडीले उपाधि जितेको हो । 

    उपाधि विजेता टिमले रु २५ हजार नगद ट्रफी, मेडलबाट पुरस्कृत भए भने उपविजेता टिमले रु १२ हजार नगद, ट्रफी र मेडलबाट पुरस्कृत भएको आयोजक निङ्गलाशैनी विकास समाजले जनाएको छ । प्रतियोगिताको ४५ वर्षमाथिको उमेर समूहमा ईश्वरी भट्ट र रमेश पाण्डेयको जोडीले उपाधि जितेको छ भने वीरेन्द्र विष्ट र नरेन्द्र चन्दको जोडी उपविजेता बन्यो । 

    उक्त विधामा विजेता टिम रु १५ हजार नगद, ट्रफी र मेडलबाट पुरस्कृत भएको प्रतियोगिता संयोजक दिलबहादुर धामीले बताउनुभयो । उपविजेता टिम रु आठ हजार नगदसहित पुरस्कृत भयो । त्यसैगरी, ५० वर्ष उमेर समूह माथिको विधामा प्रेमसिंह भाट र धीरज भट्टको जोडीले उपाधि जितेको छ भने गोकुल बोहरा र दीपेन्द्र भण्डारीको जोडी उपविजेता बन्यो । उक्त विधामा उपाधि विजेता टिम रु १० हजार नगद, ट्रफी र मेडलबाट पुरस्कृत भएको छ भने उपविजेता टिम रु पाँच हजार नगदसहित पुरस्कृत भएको छ ।
    
    प्रतियोगितामा विजेता खेलाडीलाई आयोजक निङ्गलाशैनी विकास समाजका संस्थापक अध्यक्ष प्रेमसिंह भाट, महाकाली प्रादेशिक अस्पतालका पूर्वअध्यक्ष किरण भट्ट, सुदूरपश्चिम प्रदेश फुटबल सङ्घका अध्यक्ष दिनेश श्रेष्ठलगायतले पुरस्कृत गर्नुभएको थियो । दुई दिनसम्म सञ्चालन भएको प्रतियोगितामा जिल्लाभरका ५५ समूहको सहभागिता थियो ।