Wednesday 18th of November | २०८३ मङ्सिर २ बुधबार

न्यूज अभियान
हरेक खबर विशेष खबर

इजरायली संसद्को अध्यक्षमा विपक्षी उम्मेदवार निर्वाचित

न्यूजअभियान | प्रकाशित मिति : २०८३ मङ्सिर २ बुधबार | (रासस-एएफपी)

जेरुसेलम, २ मङ्सिर : इजरायलको संसद् नेसेटको अध्यक्षमा प्रधानमन्त्री बेन्जामिन नेतान्याहुको दलका उम्मेदवारलाई पराजित गर्दै विपक्षी गठबन्धनका मतन काहाना निर्वाचित हुनुभएको छ । यसलाई नेतान्याहुको राजनीतिक प्रभाव कमजोर पार्ने विपक्षी प्रयासको महत्त्वपूर्ण उपलब्धिका रूपमा हेरिएको छ ।

मङ्गलबार भएको मतदानमा १२० सदस्यीय संसद्का ६६ सांसदले पूर्वसैनिक प्रमुख गदी आइसेनकोटका सहयोगी काहानाको पक्षमा मत दिएका थिए । नेतान्याहुको लिकुड पार्टीका उम्मेदवार ओफिर काट्जले ५२ मत प्राप्त गर्नुभयो ।

आइसेनकोट र नेतान्याहु दुवैले गत अक्टोबर २७ को निर्वाचनमा बहुमत ल्याउन नसकेपछि संसद्मा शक्ति सन्तुलन कायम हुन सकेको थिएन । आइसेनकोटको गठबन्धनले ४८ र नेतान्याहुको गठबन्धनले ५३ सिट जितेका थिए । अरब समुदायको बाहुल्य रहेका दुई दलले १९ सिट प्राप्त गरेका थिए । ती दलको समर्थनले काहानाको विजय सम्भव भएको हो ।

संसद्को अध्यक्षले बैठकको कार्यसूची र समय निर्धारण गर्नुका साथै कानूनमाथिको छलफल तथा मतदानलाई प्रभावित पार्न सक्ने भएकाले यो पद महत्त्वपूर्ण मानिन्छ । काहानाले नेतान्याहुको न्यायिक सुधार योजना खारेज गर्ने आइसेनकोटको प्रतिबद्धतालाई अघि बढाउन सक्ने अपेक्षा गरिएको छ ।

आइसेनकोटले सन् २०२३ अक्टोबर ७ मा हमासको आक्रमणअघि भएका सुरक्षा कमजोरीबारे स्वतन्त्र छानबिन आयोग गठन गर्ने बताउनुभएको छ । नेतान्याहुले भने त्यस्तो आयोग गठन गर्न अस्वीकार गर्दै आउनुभएको छ ।

नेतान्याहु र आइसेनकोटबीच एकता सरकार गठनबारे छलफल भए पनि दुवैले प्रधानमन्त्री पदमा आफ्नो दाबी नछाडेकाले सहमति हुन सकेको छैन । काहानाले अध्यक्ष निर्वाचित भएपछि सबै नागरिकको प्रतिनिधित्व गर्ने प्रतिबद्धता जनाउनुभएको छ ।

यो खबर पढेर तपाईलाई कस्तो महसुस भयो ?

न्यूज अभियान डट कमको एन्ड्रोइड एपका लागि यहाँ क्लिक गर्नुहोस् । हरेक खबर विशेष खबरका लागि अफिसियल फेसबुक र ट्वीटर मार्फत जोडिनुहोस् ।


न्यूज अभियान TV - ग्यालेरी

View All
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan