न्यूज अभियान
हरेक खबर विशेष खबर

कञ्चनपुर, २५ असोजः सुदूरपश्चिम प्रदेशका मुख्यमन्त्री खगराज भट्टले सुदूरपश्चिम प्रदेश खेलको उर्वर भूमि रहेको बताउनुभएको छ ।

महेन्द्रनगरमा आज तेस्रो वासुदेव स्मृति अन्तरविद्यालय फुटबल प्रतियोगिताको समापन कार्यक्रमलाई सम्बोधन गर्दै उहाँले सदूरपश्चिम खेलका लागि उर्वर भूमि रहेको बताउनुभएको हो ।

“सुदूरपश्चिममा हरेक खेलमा कुशल प्रतिभा छन्”, उहाँले भन्नुभयो, “यो प्रदेश खेलको उर्वर भूमि हो”, उहाँले प्रदेशले आजै सार्वजनिक गरेको बजेटले सुदूरपश्चिमको सर्वाङ्गीण विकासमा टेवा पुर्याउने बताउनुभयो । दुई महिना लामो मिहिनेत गरेर बजेट ल्याएको उहाँले बताउनुभयो ।

उहाँले प्रतियोगितामा विजेता उपविजेता टोलीलाई पुरस्कार प्रदान गर्नुभएको थियो । प्रतियोगिताको फाइनल खेलमा सरस्वती मावि झरना सागरले १–० ले ओम पुष्पाञ्जलीलाई पराजित गरेको छ ।

 विजेता टोलीले रु ५५ हजार ५५५ नगदसहित ट्रफी, मेडल र प्रमाणपत्र प्राप्त गरेको छ । उपविजेता ओम पुष्पाञ्जली स्कुलले रु ३३ हजार ३३३ नगदसहित ट्रफी, मेडल र प्रमाणपत्र प्राप्त गरेको छ ।

प्रतियोगितामा कञ्चनपुर जिल्लाका ३२ विद्यालयका टोली सहभागी भएका थिए । सहभागीमध्ये नौवटा सामुदायिक र २३ वटा संस्थागत विद्यालयले प्रतिस्पर्धा गरेको आयोजकले जनाएको छ ।