न्यूज अभियान
हरेक खबर विशेष खबर

उपसभापतिमा चन्द्र भण्डारी र मधु आचार्यबीच प्रतिस्पर्धा, समावेशी समूहमा विनोद चौधरी अगाडि
काठमाडौं । नेपाली कांग्रेसको १५औँ महाधिवेशनअन्तर्गत उपसभापति र महामन्त्री पदको मतगणनाले प्रतिस्पर्धालाई रोचक बनाएको छ। पछिल्लो मतपरिणामअनुसार उपसभापतिमा डा. चन्द्रकान्त भण्डारी र मधु आचार्यले अग्रता लिएका छन् भने महामन्त्रीमा प्रदीप पौडेल अगाडि देखिएका छन्। महिला महामन्त्रीतर्फ डा. डिला संग्रौला (पन्त) ले अग्रता कायम गरेकी छन्।
महाधिवेशनमा कुल ७ हजार ४३ मत खसेकोमा मतगणना जारी रहँदा विभिन्न पदका उम्मेदवारबीच मतान्तर देखिएको छ। अन्तिम परिणाम आउन बाँकी रहेकाले अहिलेको अग्रताले मात्रै विजेताको टुंगो लगाएको छैन।
उपसभापतिमा चन्द्र भण्डारी अगाडि

उपसभापति पदमा अहिलेसम्म २ हजार २३१ मत गणना हुँदा डा. चन्द्रकान्त भण्डारीले १ हजार ५७ मत प्राप्त गरेका छन्। मधु आचार्यले ७१२ मत पाएका छन्। त्यस्तै, सुरेन्द्रराज पाण्डेले ६८०, गोविन्द भट्टराईले ६०९, धनराज गुरुङले ४०६, दीपक गिरीले ३०१ र प्रा. डा. चन्द्रमोहन यादवले १९३ मत प्राप्त गरेका छन्।
प्राप्त मतपरिणामले उपसभापति पदमा उम्मेदवारहरूबीच प्रतिस्पर्धा जारी रहेको देखाएको छ।
समावेशी समूहमा चौधरी अगाडि
उपसभापतिको समावेशी समूहमा विनोदकुमार चौधरीले ६१५ मतसहित अग्रता लिएका छन्। जीवन परियारले ५७८ मत प्राप्त गर्दा सीता गुरुङले ३३४, फरमुल्लाह मन्सुरले २८५ र रञ्जित कर्णले १८३ मत पाएका छन्। चौधरी र परियारबीचको मतान्तर ३७ रहेको छ।
महामन्त्रीमा प्रदीप पौडेलको अग्रता
महामन्त्री पदमा प्रदीप पौडेलले १ हजार ३८१ मत प्राप्त गर्दै अग्रता लिएका छन्। उदयशमशेर राणाले ७८६ र अमरसिंह पुनले ६९५ मत प्राप्त गरेका छन्।
त्यस्तै, डा. सुनिलकुमार शर्माले ५२६, गुरुराज घिमिरेले ३२८, नैनसिंह महरले २७०, शंकर तिवारीले ४६ र डा. सन्तोष उपाध्यायले २८ मत पाएका छन्।

महिला महामन्त्रीमा डिला संग्रौला अगाडि
महिला महामन्त्रीतर्फ डा. डिला संग्रौला (पन्त) ले ९६५ मत प्राप्त गरेकी छन्। महालक्ष्मी उपाध्याय ‘डिना’ ले ९५२ मत प्राप्त गरेकी छन् भने रिता खनालले २५१ मत पाएकी छन्। संग्रौला र डिनाबीचको मतान्तर केवल १३ मत रहेकाले यस पदको प्रतिस्पर्धा पनि रोचक बनेको छ।
कांग्रेसको १५औँ महाधिवेशनअन्तर्गत मतगणना जारी छ। उम्मेदवारहरूको अग्रता र मतान्तर बदलिन सक्ने भएकाले अन्तिम नतिजाका लागि मतगणना सम्पन्न हुनुपर्नेछ।