न्यूज अभियान
हरेक खबर विशेष खबर

डडेल्धुरा, २५ असोजः अमरगढी नगरपालिका–५ तुफानडाँडाकी गौरी ऐर झोला सिलाएर मासिक रु २० हजार आम्दानी गर्दै आत्मनिर्भर बन्नुभएको छ । अमरगढी नगरपालिका–४ भलियाकी २९ वर्षीया उहाँले दुई वर्षदेखि ‘प्रगतिशील महिला लघुउद्यमी झोला समूह’ मार्फत झोला उत्पादन गर्दै आउनुभएको हो ।

नगरपालिकाबाट डेढ महिनाको तालिम लिएपछि उहाँले झोला उत्पादन सुरु गर्नुभएको हो । व्यवसाय सुरु गर्दा नगरपालिकाले कपडा र सिलाइ मेसिन पनि उपलब्ध गराएको उहाँले बताउनुभयो । सुरुमा पाँच जना महिला आबद्ध रहेको समूहमा अहिले भने ऐर एक्लैले व्यवसायलाई निरन्तरता दिइरहनुभएको छ ।

उहाँले टिफिन ब्याग, साइड ब्याग, स्कुल ब्याग र जेब्रा ब्यागलगायतका झोला उत्पादन गर्दै आउनुभएको छ । एउटा झोला तयार गर्न करिब चार घण्टा लाग्ने भएकाले दैनिक दुईदेखि तीनवटासम्म झोला उत्पादन गर्ने गरेको उहाँले बताउनुभयो । उहाँले उत्पादन गरेका झोलाको माग डडेल्धुरासँगै बैतडीबाट पनि आउने गरेको छ ।

झोला बनाउन आवश्यक कच्चापदार्थ डडेल्धुरामा सहज रूपमा उपलब्ध नहुँदा धनगढीबाट ल्याउनुपर्ने बाध्यता रहेको ऐरले बताउनुभयो । हाल उपलब्ध मेसिनबाटै काम गरिरहनुभएकी उहाँले लगानी बढाएर  व्यवसाय विस्तार गर्ने योजना सुनाउनुभयो । “पहिला सामान्य खर्चका लागि पनि घरपरिवारमाथि निर्भर हुनुपथ्र्यो, अहिले परिवारको पूरै खर्च मैले नै धान्दै आएकी छु”, उहाँले भन्नुभयो ।

परिवारको सहयोग पाएकाले आफू आफ्नो पेसाप्रति सन्तुष्ट रहेको उहाँले बताउनुभयो । उद्यमी ऐरले अन्य महिलालाई पनि सीप सिकेर आत्मनिर्भर बन्न आग्रह गर्दै झोला बनाउन सिक्न चाहने महिलालाई सीप सिकाउन तयार रहेको बताउनुभयो ।