न्यूज अभियान
हरेक खबर विशेष खबर

कास्की, १७ असोजः पोखराको पुरानो सामाजिक संस्था सिद्धार्थ क्लबले गत भदौ १० गतेको भोटेकोशी बाढी पीडितका लागि रु पाँच लाख २० हजार ३३६ सहयोग गरेको छ । मानवीय भावना र सामाजिक उत्तरदायित्वबापत सो सहयोग रकम प्रधानमन्त्री दैवीप्रकोप उद्धार कोषमा जम्मा गरेको क्लबको आज पोखरामा सम्पन्न ४१औँ पदस्थापन समारोहमा जानकारी दिइएको हो ।

    यसैगरी, क्लबको वार्षिक साधारणसभा तथा पदस्थापना समारोहबाट आगामी कार्यकालका लागि सुनील श्रेष्ठको अध्यक्षतामा नयाँ कार्यसमितिसमेत चयन गरिएको हो । क्लबको प्रथम उपाध्यक्षमा नवराज गोठाजु, द्वितीय उपाध्यक्षमा प्रकाशमान श्रेष्ठ, निर्देशकमा ज्ञानेश्वरराज श्रेष्ठ, सचिवमा अनिल श्रेष्ठ, कोषाध्यक्षमा मदन मुल्मी र सहसचिवमा जमुना अधिकारी चयन हुनुभयो । यसैगरी सदस्यमा शशि मर्सानी र वीरेन्द्र बाटाजु रहनुभएको छ ।

    नवनिर्वाचित अध्यक्ष श्रेष्ठले पदभार ग्रहण गर्दै आर्थिक अभावका कारण शिक्षाबाट वञ्चित हुने बालबालिकालाई सहयोग गर्ने उद्देश्यले आफ्ना स्व बुबा डिलबहादुर श्रेष्ठको स्मृतिमा रु दुई लाखको अक्षय कोष स्थापना गर्ने घोषणा गर्नुभएको छ । सो अक्षयकोष सिद्धार्थ क्लब पोखरामार्फत सञ्चालन गरिने र त्यसबाट आर्थिक रूपमा कमजोर बालबालिकाको शिक्षामा सहयोग गरिने श्रेष्ठले बताउनुभयो । अध्यक्ष श्रेष्ठले आगामी वर्षमा रकम थप गर्दै लैजाने प्रतिबद्धतासमेत जनाउनुभयो ।

    विसं २०४१ मा स्थापना भएको सिद्धार्थ क्लबले शिक्षा, स्वास्थ्य, महिला तथा बालबालिका सशक्तीकरण, वातावरण संरक्षण, विपद् व्यवस्थापन तथा सामाजिक सेवाका क्षेत्रमा विभिन्न कार्यक्रम सञ्चालन गर्दै आएको छ । समारोहमा गैरसरकारी संस्था महासङ्घ नेपाल, गण्डकी प्रदेशका अध्यक्ष पदम पहारी, नेपाल उद्योग वाणिज्य महासङ्घका पूर्वअध्यक्ष आनन्दराज मुल्मी, सल्लाहकार समिति संयोजक सचिन श्रेष्ठ, राष्ट्रिय फोटो पत्रकार समूहका केन्द्रीय अध्यक्ष प्रदीपराज वन्त लगायतको उपस्थिति थियो ।