न्यूज अभियान
हरेक खबर विशेष खबर

कर्णाली, ११ भदौः कर्णाली प्रदेश पूर्णखोप सुनिश्चितता तथा दिगोपना घोषणा भएको छ । सामाजिक विकास मन्त्रालय, स्वास्थ्य सेवा निर्देशनालय वीरेन्द्रनगरको आयोजनामा बुधबार कर्णाली प्रदेशलाई पूर्णखोप सुनिश्चितता घोषणा गरिएको हो ।

कर्णाली प्रदेश सरकारका सामाजिक विकासमन्त्री जीतबहादुर मल्लले पूर्णखोप सुनिश्चितता तथा दिगोपना घोषणा हुनुको प्रमुख श्रेय स्वास्थ्य स्वयंसेविका र स्वास्थ्यकर्मीलाई जाने बताउनुभयो । पूर्णखोप सुनिश्चितताका आवश्यक सूचक तथा मापदण्ड पूरा गरेपश्चात् गरिएको घोषणाको दिगोपना सबैभन्दा ठूलो चुनौती भएको बताउँदै उहाँले यसलाई सामना गरेर अगाडि बढ्नुपर्नेमा जोड दिनुभयो ।  

विकट भूगोल, आवश्यक स्रोत, साधन तथा जनशक्तिको अभावका बीचमा पूर्णखोप सुनिश्चितताको प्रदेश घोषणा हुनु आफैँमा महत्वपूर्ण भएको उहाँको भनाइ छ । 

जिल्ला समन्वय समिति सुर्खेतका प्रमुख गङ्गाराम सुनारले काम गर्नेलाई प्रोत्साहन गर्न सकिए आगामी दिनमा थप प्रगति हुने धारणा राख्नुभयो । कर्णालीको विकट भूगोलको भूई तहमा रहेर काम गर्ने स्वयंसेविकाको उच्च मूल्याङ्कन गर्नुपर्ने उहाँको भनाइ थियो । 

मन्त्रालयका सचिव रोशनीकुमारी श्रेष्ठले आधारभूत तहमा काम गर्ने स्वास्थ्यकर्मीको योगदान, युनिसेफलगायतका साझेदार निकायको प्राविधिक सहयोग र मिडियाकर्मीको विशेष भूमिकाले कर्णाली पूर्णखोप सुनिश्चिता घोषणा हुन सकेको टिप्पणी गर्नुभयो । 

राष्ट्रिय खोप समन्वय समितिको सिफारिसअनुसार कर्णालीलाई दोस्रो पटक पूर्णखोप सुनिश्चितता र दिगोपनाको प्रदेश घोषणा गरिएको उहाँले जानकारी दिनुभयो । 

संयुक्त राष्ट्र सङ्घीय बालकोष (युनिसेफ) नेपालका कर्णाली प्रदेश प्रमुख दीपक श्रेष्ठले लामो समयदेखिको अभियानले पूर्णता पाएकामा प्रसन्नता व्यक्त गर्नुभयो । 

–––